సింహాచలం చందనోత్సవం: నిజరూప దర్శనానికి భక్తుల వెల్లువ

సింహాచలం అప్పన్న స్వామి నిజరూపాన్ని వర్ణించే ప్రసిద్ధ శ్లోకం “కుందాబ సుందర తనుః…” భక్తుల్లో ప్రత్యేక భక్తి భావాన్ని రేకెత్తిస్తోంది. కుంద పుష్పంలాంటి శుభ్రమైన కాంతి, చంద్రబింబాన్ని తలపించే ముఖ కాంతి, త్రినేత్ర స్వరూపం, త్రిభంగి భంగిమలో శాంత స్వరూపంగా కొలువై ఉన్న వరాహ నృసింహుడి మహిమను ఈ శ్లోకం ప్రతిబింబిస్తుంది.ఏడాదంతా చందనపు పొరలతో ఆవరించబడిన స్వామివారు, వైశాఖ శుద్ధ తదియ రోజున మాత్రమే నిజరూపంలో దర్శనమిస్తారు. చందనాన్ని తొలగించి తిరిగి సమర్పించే ఈ ప్రత్యేక ఉత్సవమే చందనోత్సవం. కొన్ని గంటలపాటు మాత్రమే లభించే ఈ దర్శనం కోసం లక్షలాది మంది భక్తులు సింహాద్రికి తరలివస్తారు.

భక్తుల రద్దీని దృష్టిలో ఉంచుకుని దేవస్థానం అధికారులు సమగ్ర ఏర్పాట్లు చేశారు. గంటకు సుమారు 10 వేల మందికి దర్శనం కల్పించేలా క్యూలైన్ నిర్వహణ చేపట్టారు. అంటే సెకనుకు ఇద్దరు భక్తులకు దర్శనం కల్పించే స్థాయిలో వేగవంతమైన విధానం అమలు చేస్తున్నారు. అయినప్పటికీ, క్షణాల్లోనే ముగిసే ఈ దర్శనం వల్ల భక్తులు స్వామి రూపాన్ని మనసులో నిలుపుకోవాలని అర్చకులు సూచిస్తున్నారు.భక్తులు ముందుగానే స్వామి రూపాన్ని ధ్యానించి, ఆధ్యాత్మిక భావంతో దర్శనానికి వెళ్లితే విశేష అనుభూతి పొందవచ్చని తెలిపారు. లౌకిక ఆలోచనలను దూరం పెట్టి, భక్తి భావంతో దర్శించుకుంటే స్వామి అనుగ్రహం మరింతగా లభిస్తుందని పేర్కొన్నారు.

సోమవారం వేకువజామున 3 గంటల నుంచే సాధారణ భక్తులకు నిజరూప దర్శనం ప్రారంభమైంది. రాత్రి 11 గంటల వరకు క్యూలైన్లలో ఉన్న ప్రతి భక్తుడికి దర్శనం కల్పించేలా అధికారులు చర్యలు తీసుకున్నారు.

చందనోత్సవ నిర్వహణలో అంతరాలయ దర్శనాల నియంత్రణ ప్రధాన సవాలుగా మారింది. గతంలో వీఐపీ దర్శనాల కారణంగా ఉచిత క్యూలైన్లు నిలిచిపోయిన సందర్భాలు ఉండటంతో ఈసారి కఠిన నియంత్రణలు అమలు చేస్తున్నారు. వీఐపీలకు పరిమిత టికెట్లు మాత్రమే జారీ చేసి, ఉదయం 4 నుంచి 5 గంటల మధ్యలోనే అంతరాలయ దర్శనాలు పూర్తి చేసేలా ప్రణాళిక రూపొందించారు.

ఈసారి వీఐపీ టికెట్లను 500కు పరిమితం చేసి, అనంతరం భోగమండపం మార్గాన్ని మూసివేయాలని నిర్ణయించారు. రూ.1500, రూ.1000, రూ.300 టికెట్ల ద్వారా దర్శనాలను సమర్థంగా నిర్వహిస్తూ, ఉచిత క్యూలైన్లకు ఆటంకం కలగకుండా చర్యలు చేపడుతున్నారు.మొత్తం మీద, సమర్థ నిర్వహణతోనే చందనోత్సవం విజయవంతమవుతుందని అధికారులు భావిస్తున్నారు. భక్తుల సహకారం, నియంత్రణ చర్యలు సమన్వయంగా అమలైతే ఈ మహోత్సవం నిరాఘాటంగాకొనసాగుతుందని పేర్కొన్నారు.