పీరియడ్స్ సమయంలో యోగా చేయొచ్చా? నిపుణుల స్పష్టత

యోగం శారీరక, మానసిక ఆరోగ్యానికి ఎంతో మేలు చేస్తుందని అందరికీ తెలిసిందే. అయితే రుతుక్రమం (పీరియడ్స్) సమయంలో యోగా చేయకూడదనే అపోహ చాలా మంది మహిళల్లో ఉంది. ఈ కారణంగా ఆ రోజుల్లో యోగాకు దూరంగా ఉండటం సాధారణంగా కనిపిస్తుంది. కానీ నిపుణుల అభిప్రాయం ప్రకారం సరైన మార్గదర్శకత్వంలో యోగా చేయడం పీరియడ్స్ సమయంలో కూడా సురక్షితమే కాకుండా అనేక ఆరోగ్య ప్రయోజనాలను అందిస్తుంది.

జూన్ 21న అంతర్జాతీయ యోగా దినోత్సవం సందర్భంగా సోషల్ మీడియాలో పోస్ట్ చేసిన వీడియోలో అంషులా కపూర్, యోగా ట్రైనర్ అంషుకా పార్వాణీ కలిసి పలు అపోహలను ఖండించారు. పీరియడ్స్ సమయంలో యోగా చేయకూడదనే భావన పూర్తిగా అపోహేనని వారు స్పష్టం చేశారు.

పీరియడ్స్‌లో యోగా చేయొచ్చా?

చాలామంది మహిళలు రుతుక్రమ సమయంలో యోగాను ఆపేస్తారు. కానీ అంషులా కపూర్ ప్రకారం పీరియడ్స్ ఉన్నా లేకపోయినా యోగా సాధన కొనసాగించవచ్చని చెబుతున్నారు. అయితే శరీరాన్ని తలకిందులుగా ఉంచే ఇన్‌వర్షన్ ఆసనాల విషయంలో జాగ్రత్త అవసరమని, శరీరం ఇచ్చే సంకేతాలను గమనించి అసౌకర్యంగా అనిపిస్తే వాటిని నివారించడం మంచిదని సూచిస్తున్నారు. ఈ అంశంపై పీరియడ్స్ సమయంలో ఆ ఆసనాలు చేయకూడదనే శాస్త్రీయ ఆధారాలు లేవని అంషుకా పార్వాణీ పేర్కొన్నారు.

అలాగే పీరియడ్స్ సమయంలో యోగా ట్విస్ట్‌లు చేయడం హానికరం కాదని నిపుణులు చెబుతున్నారు. యోగా చేయడం వల్ల శరీరం రిలాక్స్ అవడంతో పాటు ఎండార్ఫిన్స్ విడుదలై మానసిక ప్రశాంతత కలుగుతుంది. పీరియడ్స్ సమయంలో యోగా చేస్తే రుతుచక్రం మారిపోతుందనే భావన కూడా అపోహేనని స్పష్టం చేస్తున్నారు. క్రమం తప్పకుండా యోగా సాధన చేయడం వల్ల హార్మోన్ల సమతుల్యత మెరుగుపడి రుతుచక్రం క్రమబద్ధంగా ఉండే అవకాశం పెరుగుతుందని పేర్కొన్నారు.

పీరియడ్స్ సమయంలో యోగా చేయడం వల్ల కలిగే ప్రయోజనాలు

పీరియడ్స్ నొప్పులు, కడుపు ఉబ్బరం, నడుము నొప్పి వంటి సమస్యల నుంచి ఉపశమనం
శరీరంలో ఎండార్ఫిన్స్ విడుదలై మానసిక ఉల్లాసం కలగడం
ఒత్తిడి తగ్గి మనసు ప్రశాంతంగా ఉండటం
రుతుచక్రం క్రమబద్ధంగా మారేందుకు సహకారం
శరీరానికి తేలిక, విశ్రాంతి కలగడం

ఏ ఆసనాలను నివారించాలి?

యోగా గురువు మన్సూర్ బలౌచ్ సూచనల ప్రకారం చైల్డ్ పోజ్, డౌన్‌వర్డ్ డాగ్, లెగ్స్ అప్ ది వాల్ వంటి సాధారణ స్ట్రెచింగ్ ఆసనాలు పీరియడ్స్ సమయంలో ఉపశమనం కలిగిస్తాయి. కానీ బో పోజ్, హెడ్‌స్టాండ్, హ్యాండ్‌స్టాండ్ వంటి క్లిష్టమైన ఆసనాలను నివారించడం మంచిదని సూచిస్తున్నారు. ఈ సమయంలో శరీరం మరింత సున్నితంగా ఉండటంతో అధిక ఒత్తిడి కలిగించే ఆసనాలు అసౌకర్యాన్ని పెంచే అవకాశం ఉంటుంది.

మొత్తానికి, పీరియడ్స్ సమయంలో యోగా చేయకూడదనే అపోహకు శాస్త్రీయ ఆధారాలు లేవని నిపుణులు స్పష్టం చేస్తున్నారు. ప్రతి మహిళ తన శరీర పరిస్థితిని గమనిస్తూ సౌకర్యంగా అనిపించే ఆసనాలను మాత్రమే చేయడం ఉత్తమమని సూచిస్తున్నారు. సరైన యోగా సాధన రుతుక్రమ సమయంలో శారీరక మరియు మానసిక ఆరోగ్యాన్ని మెరుగుపరచడంలో సహాయపడుతుంది.