కరవు నేలపై కృష్ణమ్మ పరవళ్లు.. కొత్త చరిత్రకు నాంది: చంద్రబాబు

వెలిగొండ సాగునీటి ప్రాజెక్టుతో కరవు ప్రాంతాల రూపురేఖలు మారనున్నాయని సీఎం చంద్రబాబు అన్నారు. వెలిగొండ బంగారు కొండగా మారుతుందని పేర్కొన్నారు. వెలిగొండ సాగునీటి ప్రాజెక్టు తొలి దశను ఆయన ప్రారంభించి జాతికి అంకితం చేశారు. అనంతరం నిర్వహించిన బహిరంగ సభలో ప్రాజెక్టు ప్రాధాన్యాన్ని వివరిస్తూ ప్రసంగించారు.

‘‘మాట ఇచ్చాను.. నిలబెట్టుకున్నాను. పునాది వేశాను.. ప్రాజెక్టును పూర్తి చేశాను. ఇది నా అదృష్టం. 1996లో ఈ ప్రాజెక్టుకు భూమిపూజ చేశాను. 30 ఏళ్ల తర్వాత తొలి దశను ప్రారంభించి జాతికి అంకితం చేశాను. నాడు చేసిన సంకల్పం.. నేడు నల్లమల సాగర్‌లో జలసిరిగా మారింది’’ అని చంద్రబాబు అన్నారు.

వెలిగొండ ప్రాజెక్టు నిర్మాణం ఎన్నో సవాళ్లతో కూడుకున్నదని సీఎం తెలిపారు. కొండలు అడ్డొచ్చినా వాటిని తొలిచి ముందుకు సాగామని చెప్పారు. కరవుపై గెలవాలన్న సంకల్పంతో ప్రాజెక్టును పూర్తి చేసినట్లు పేర్కొన్నారు. ‘‘కరవు నేలపై కృష్ణమ్మ రాసిన కొత్త చరిత్ర ఇది’’ అని అభివర్ణించారు.

ప్రాజెక్టు కోసం భూములు త్యాగం చేసిన ప్రజలకు సీఎం కృతజ్ఞతలు తెలిపారు. వారి త్యాగాలను ఎప్పటికీ మరచిపోలేమని చెప్పారు. సాగునీటి ప్రాజెక్టులు పూర్తయితే రైతులకు ఎంతో ప్రయోజనం కలుగుతుందని, కరవు ప్రాంతాలు సస్యశ్యామలం అవుతాయని పేర్కొన్నారు.

2024 ఎన్నికల సమయంలో రాష్ట్ర పునర్నిర్మాణంపై తాను, ప్రధాని నరేంద్ర మోదీ, ఉప ముఖ్యమంత్రి పవన్‌ కల్యాణ్‌ కలిసి ప్రజలకు హామీ ఇచ్చామని చంద్రబాబు గుర్తుచేశారు. తమపై నమ్మకం ఉంచి ప్రజలు తిరుగులేని ఆధిక్యాన్ని అందించారని అన్నారు. ప్రజల విశ్వాసాన్ని నిలబెట్టుకునేలా అభివృద్ధి, సంక్షేమ కార్యక్రమాలను ముందుకు తీసుకెళ్తున్నామని చెప్పారు.

కేంద్ర, రాష్ట్ర ప్రభుత్వాల సమన్వయంతో రాష్ట్రానికి అనేక ప్రయోజనాలు చేకూరుతున్నాయని సీఎం అన్నారు. డబుల్‌ ఇంజిన్‌ సర్కార్‌తో రాష్ట్ర అభివృద్ధికి వేగం పెరిగిందని పేర్కొన్నారు. సాగునీటి ప్రాజెక్టుల పూర్తితో వ్యవసాయ రంగానికి ఊతం లభించడంతో పాటు గ్రామీణ ఆర్థిక వ్యవస్థ బలోపేతం అవుతుందని తెలిపారు.

వెలిగొండ తొలి దశ అందుబాటులోకి రావడంతో కరవు ప్రాంతాల్లో సాగునీటి భద్రతకు మరింత బలం చేకూరనుంది. ఎన్నో ఏళ్లుగా ఎదురుచూస్తున్న ఈ ప్రాజెక్టు సాకారం కావడంతో రైతుల్లో ఆశలు చిగురిస్తున్నాయి.