నలుగురిని బలిగొన్న పులి బంధనం.. ఊపిరిపీల్చుకున్న అమరావతి, వర్ధా ప్రజలు

మహారాష్ట్రలోని అమరావతి, వర్ధా జిల్లాల్లో గత కొంతకాలంగా ప్రజలను భయాందోళనకు గురిచేసిన పులిని అటవీశాఖ అధికారులు ఎట్టకేలకు బంధించారు. సోమవారం షిర్‌జ్‌గావ్‌ కస్బా ప్రాంతంలో ప్రత్యేకంగా ఏర్పాటు చేసిన బృందం తీవ్రంగా శ్రమించి పులికి మత్తు ఇంజెక్షన్‌ ఇచ్చి సురక్షితంగా పట్టుకుంది.

గత 20 రోజులుగా అమరావతి, వర్ధా జిల్లాల్లోని పలు ప్రాంతాల్లో ఈ పులి సంచరిస్తూ పశువులతో పాటు మనుషులపై కూడా దాడులకు పాల్పడింది. దీంతో ఆయా ప్రాంతాల ప్రజలు ఇళ్ల నుంచి బయటకు రావాలన్నా భయపడే పరిస్థితి నెలకొంది. పులి సంచారంతో గ్రామీణ ప్రాంతాల్లో తీవ్ర ఆందోళన నెలకొనడంతో అటవీశాఖ అధికారులు ప్రత్యేక నిఘా ఏర్పాటు చేశారు.

ఈ క్రమంలో సెప్టెంబరు 6న కేవలం 24 గంటల వ్యవధిలో పులి దాడులకు ఇద్దరు వ్యక్తులు మృతి చెందడంతో అధికారులు మరింత అప్రమత్తమయ్యారు. పులి కదలికలను గుర్తించేందుకు ప్రత్యేక బృందాలతో గాలింపు చర్యలను ముమ్మరం చేశారు.

పులి ఆచూకీ కోసం కెమెరా ట్రాప్స్‌, థర్మల్‌ డ్రోన్లు, ఇతర సాంకేతిక పరికరాలను వినియోగించారు. పులి సంచరిస్తున్న ప్రాంతాలను గుర్తించి పర్యవేక్షణ పెంచారు. చివరకు షిర్‌జ్‌గావ్‌ కస్బా ప్రాంతంలో పులి కదలికలను గుర్తించిన అధికారులు పక్కా వ్యూహంతో ఆపరేషన్‌ చేపట్టారు.

ప్రత్యేక బృందం పులికి మత్తు ఇంజెక్షన్‌ ఇచ్చి పట్టుకోవడంతో అధికారులు ఊపిరిపీల్చుకున్నారు. పులి బంధనంతో గత కొన్ని రోజులుగా భయాందోళనలో ఉన్న స్థానికులు కూడా కొంత ఉపశమనం పొందారు.

అధికారుల వివరాల ప్రకారం.. పులి దాడుల్లో మొత్తం నలుగురు వ్యక్తులు మృతి చెందారు. పలు పశువులు కూడా తీవ్రంగా గాయపడ్డాయి. మృతుల కుటుంబాలకు అటవీశాఖ అధికారులు ఆర్థిక సాయం అందించారు. పులి బంధనంతో మనుషులు, వన్యప్రాణుల మధ్య ఘర్షణను నివారించేందుకు అధికారులు చేపట్టిన చర్యలకు తాత్కాలికంగా ఉపశమనం లభించింది.