నియోజకవర్గానికి రూ.కోటి.. చిన్న సమస్యలకు తక్షణ పరిష్కారం

రాష్ట్రంలో అభివృద్ధి కార్యక్రమాలను వేగవంతం చేయడంతో పాటు పార్టీని క్షేత్రస్థాయిలో మరింత బలోపేతం చేయాలని ముఖ్యమంత్రి చంద్రబాబు నాయుడు టీడీపీ ప్రజాప్రతినిధులకు సూచించారు. ప్రతి శాసనసభ నియోజకవర్గంలో 25 ప్రధాన సమస్యలు, అభివృద్ధి అవసరాలను గుర్తించి ప్రాధాన్యక్రమంలో పరిష్కారానికి చర్యలు చేపట్టాలని తెలిపారు.

చిన్న చిన్న సమస్యల పరిష్కారానికి ప్రతి నియోజకవర్గానికి రూ.కోటి చొప్పున నిధులు కేటాయించేందుకు సీఎం అంగీకరించారు. ఎంపీలు కూడా తమ పరిధిలోని అసెంబ్లీ నియోజకవర్గాల్లో అభివృద్ధి పనులకు ఎంపీ ల్యాడ్స్‌ నిధులను ప్రాధాన్యక్రమంలో వినియోగించాలని సూచించారు.

స్థానిక సంస్థల ఎన్నికల్లో విజయం సాధించడం ద్వారా 2029 సాధారణ ఎన్నికలకు బలమైన పునాది వేయాలని చంద్రబాబు స్పష్టం చేశారు. 2029 ఎన్నికల్లో విజయం సాధించడమే తన ప్రధాన లక్ష్యమని, 2024 కంటే మెరుగైన ఫలితాలు సాధించేందుకు ఇప్పటి నుంచే క్షేత్రస్థాయిలో పార్టీ శ్రేణులు పనిచేయాలని సూచించారు.

ప్రభుత్వంపై ప్రజల్లో ఉన్న సానుకూలతను పార్టీకి అనుకూలంగా మలచాలంటే ప్రజలతో నిరంతరం మమేకం కావాలని, కేడర్‌తో సమన్వయం పెంచుకోవాలని నేతలకు సూచించారు. అలాగే మహిళలకు రిజర్వ్‌ చేసిన స్థానాల్లో సమర్థులైన నాయకులను ముందుగానే గుర్తించాలని తెలిపారు.

స్వర్ణాంధ్ర విజన్‌-2047 లక్ష్యాలను నియోజకవర్గాల స్థాయిలో అమలు చేస్తూ అభివృద్ధికి కొత్త దిశ చూపాలని సీఎం సూచించారు. అభివృద్ధి పనులు ప్రజలకు కనిపించేలా సాగితే ప్రభుత్వంపై విశ్వాసం మరింత పెరుగుతుందని, అదే ఎన్నికల్లో విజయానికి దోహదపడుతుందని పేర్కొన్నారు.

రాష్ట్రాభివృద్ధిని అడ్డుకునే ప్రయత్నాలు, పెట్టుబడులపై దుష్ప్రచారం వంటి అంశాలను ప్రజలకు వాస్తవాలతో వివరించాలని పార్టీ నేతలకు చంద్రబాబు సూచించారు. ప్రజల్లో వాస్తవాలను తీసుకెళ్లి ప్రతిపక్షాల ప్రచారాన్ని తిప్పికొట్టాలని పిలుపునిచ్చారు.