సీబీఎస్‌ఈ కీలక ప్రకటన.NEP అమలు దిశగా రెండు విడతల బోర్డు పరీక్షలు

సీబీఎస్‌ఈ పదో తరగతి బోర్డు పరీక్షల నిర్వహణ విధానంలో ఈ ఏడాది నుంచి అమలవుతున్న ద్వివిడత వ్యవస్థపై మరింత స్పష్టత ఇచ్చింది. విద్యార్థులు కేవలం రెండో విడతలో మాత్రమే పరీక్షలు రాస్తామని కోరిన నేపథ్యంలో, బోర్డు ఈ అంశంపై స్పష్టమైన మార్గదర్శకాలు జారీ చేసింది.బోర్డు ప్రకారం, ఫిబ్రవరిలో జరిగే తొలి విడత పరీక్షలు ప్రతి విద్యార్థికి తప్పనిసరి. ఈ విడతకు హాజరు కాకుండా నేరుగా మే నెలలో జరిగే రెండో విడత పరీక్షలు రాయడం సాధ్యం కాదని స్పష్టం చేసింది. విద్యార్థుల హాజరు రికార్డులు, సబ్జెక్ట్ వారీగా ప్రదర్శన ఆధారంగా రెండో విడతకు అర్హత నిర్ణయించబడుతుంది.

తొలి విడతలో మూడు లేదా అంతకంటే ఎక్కువ సబ్జెక్టులకు గైర్హాజరైన విద్యార్థులను ‘ఎసెన్షియల్ రిపీట్’ కేటగిరీలో ఉంచుతారు. అలాంటి విద్యార్థులు మే నెలలో జరిగే పరీక్షలకు అనుమతించబడరు. వారు తదుపరి ఏడాది ఫిబ్రవరిలో జరిగే బోర్డు పరీక్షలకు మాత్రమే హాజరవచ్చు.ఒకటి లేదా రెండు సబ్జెక్టుల్లో మాత్రమే అనుతీర్ణులైన విద్యార్థులను ‘కంపార్ట్‌మెంట్’ కేటగిరీలో ఉంచుతారు. ఈ కేటగిరీలో ఉన్నవారికి మే నెలలో జరిగే రెండో విడత పరీక్షలు రాసే అవకాశం ఉంటుంది.

ఇంప్రూవ్‌మెంట్ పరీక్షల విషయంలో కూడా బోర్డు స్పష్టతనిచ్చింది. ఇప్పటికే ఉత్తీర్ణులైన విద్యార్థులు తమ మార్కులను మెరుగుపర్చుకోవడానికి గరిష్టంగా మూడు సబ్జెక్టుల్లో మళ్లీ పరీక్ష రాయవచ్చు. ఈ అవకాశాన్ని ఉపయోగించుకోవాలంటే తొలి విడత పరీక్షలకు హాజరై ఉండాల్సిందే.నూతన జాతీయ విద్యా విధానం (NEP) సిఫార్సుల మేరకు విద్యార్థులపై పరీక్షల ఒత్తిడి తగ్గించడం, ప్రదర్శనను మెరుగుపర్చుకునే అవకాశాలు కల్పించడం లక్ష్యంగా ఈ ద్వివిడత విధానం అమలులోకి తీసుకువచ్చినట్లు బోర్డు తెలిపింది.ఫిబ్రవరి 17 నుంచి ప్రారంభమవుతున్న తొలి విడత పరీక్షలు మార్చి 10 వరకు కొనసాగనున్నాయి. రెండు విడతలూ పూర్తి సిలబస్ ఆధారంగానే నిర్వహించబడతాయని సీబీఎస్‌ఈ స్పష్టం చేసింది.విద్యార్థులు పరీక్షల నిబంధనలు, అర్హత ప్రమాణాలను పూర్తిగా అవగాహన చేసుకుని సమయానికి హాజరవ్వాలని బోర్డు సూచించింది.