న్యాయశాస్త్రంలో విశేష పాండిత్యం ఉన్న నిపుణులను సుప్రీంకోర్టు న్యాయమూర్తులుగా నియమిస్తే అత్యున్నత న్యాయస్థానంలో మరింత వైవిధ్యం, విభిన్న దృక్కోణాలు చోటుచేసుకుంటాయని సుప్రీంకోర్టు న్యాయమూర్తి జస్టిస్ ఉజ్జల్ భూయాన్ అభిప్రాయపడ్డారు. రాజ్యాంగం ఇందుకు అవకాశం కల్పిస్తున్నప్పటికీ.. 76 ఏళ్లుగా ఒక్క న్యాయవిద్యా నిపుణుడికీ సుప్రీంకోర్టు న్యాయమూర్తిగా అవకాశం దక్కకపోవడం విచారకరమని పేర్కొన్నారు.
దిల్లీలోని నేషనల్ లా యూనివర్సిటీ పోస్ట్ గ్రాడ్యుయేట్ విద్యార్థుల 13వ స్నాతకోత్సవంలో ఆదివారం ఆయన ప్రసంగించారు. ఈ సందర్భంగా సుప్రీంకోర్టు న్యాయమూర్తుల నియామక విధానంతో పాటు విశ్వవిద్యాలయాల్లో ప్రశ్నించే స్వేచ్ఛపై కీలక వ్యాఖ్యలు చేశారు.
రాజ్యాంగంలోని ఆర్టికల్ 124(3)(సీ) ప్రకారం న్యాయశాస్త్రంలో ప్రత్యేక పరిజ్ఞానం కలిగిన వ్యక్తులను సుప్రీంకోర్టు న్యాయమూర్తులుగా నియమించే అవకాశం ఉందని జస్టిస్ భూయాన్ గుర్తుచేశారు. అయినప్పటికీ ఇప్పటివరకు హైకోర్టు న్యాయమూర్తులు, ప్రాక్టీస్ చేస్తున్న న్యాయవాదుల నుంచే ఎక్కువగా నియామకాలు జరుగుతున్నాయని పేర్కొన్నారు.
హైకోర్టు సీనియర్ న్యాయమూర్తులు, ప్రధాన న్యాయమూర్తులను సుప్రీంకోర్టుకు పదోన్నతి కల్పించడం సంప్రదాయంగా కొనసాగుతోందని చెప్పారు. కొన్ని సందర్భాల్లో బార్ నుంచి నేరుగా నియామకాలు జరిగినప్పటికీ.. ఈ రెండు వర్గాలకు చెందని న్యాయకోవిదులకు మాత్రం అవకాశం దక్కలేదని తెలిపారు.
న్యాయవిద్యా నిపుణులకు వాస్తవ పరిస్థితులను ఎదుర్కొన్న అనుభవం ఉండదనే వాదనను జస్టిస్ భూయాన్ తోసిపుచ్చారు. ప్రపంచంలోని పలు దేశాల్లో న్యాయశాస్త్ర నిపుణులను రాజ్యాంగ న్యాయస్థానాల న్యాయమూర్తులుగా నియమించే విధానం ఉందని పేర్కొన్నారు. ఇలాంటి నిపుణులు సుప్రీంకోర్టులో భాగమైతే న్యాయ నిర్ణయ ప్రక్రియకు మరింత వైవిధ్యం, బలం చేకూరుతుందని అభిప్రాయపడ్డారు.
విద్యార్థులు భిన్నమైన అభిప్రాయాలను వ్యక్తం చేయడం, ఇబ్బందికరమైన ప్రశ్నలు అడగడాన్ని తప్పుగా చూడకూడదని జస్టిస్ భూయాన్ అన్నారు. ఇందుకు కఠిన చర్యలతో హెచ్చరించడం అధికార దుర్వినియోగానికి దారితీస్తుందని, రాజ్యాంగ స్ఫూర్తికి విరుద్ధమని పేర్కొన్నారు.
విశ్వవిద్యాలయాలు భిన్నమైన ఆలోచనలను పరిశీలించి, ప్రశ్నించే వాతావరణాన్ని కల్పించే ప్రదేశాలుగా ఉండాలని అన్నారు. విద్యార్థుల్లో స్వేచ్ఛగా ఆలోచించే అలవాటును పెంపొందించాల్సిన అవసరం ఉందని చెప్పారు.
ప్రశ్నించడం అంటే ఎదురు తిరగడం కాదని జస్టిస్ భూయాన్ స్పష్టం చేశారు. భిన్నాభిప్రాయాలను వ్యక్తం చేసే వారిపట్ల సహనం లేకుండా వ్యవహరించడం భారత రాజ్యాంగ స్ఫూర్తికి వ్యతిరేకమని పేర్కొన్నారు. దిల్లీలో విద్యార్థుల నిరసనల నేపథ్యంలో ఆయన చేసిన ఈ వ్యాఖ్యలు ప్రాధాన్యం సంతరించుకున్నాయి.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews Wellness WorldNews
