విశాఖ కేంద్రంగా ఏర్పాటు కానున్న డేటా సెంటర్లపై వస్తున్న విమర్శలకు ఐటీ శాఖ మంత్రి నారా లోకేశ్ స్పష్టత ఇచ్చారు. డేటా సెంటర్ల ఏర్పాటుతో విశాఖ నగరానికి నీటి కొరత ఏర్పడుతుందంటూ జరుగుతున్న ప్రచారంలో వాస్తవం లేదని ఆయన స్పష్టం చేశారు. ఏఐ ఆధారిత డిజిటల్ ఆర్థిక వ్యవస్థకు, దేశ డేటా సార్వభౌమత్వానికి డేటా సెంటర్లు కీలకమని పేర్కొన్నారు.
అసెంబ్లీలో జనసేన ఎమ్మెల్యే నాగమాధవి అడిగిన ప్రశ్నకు మంత్రి సమాధానమిస్తూ.. డేటా సెంటర్ల అనుమతుల విషయంలో ఎలాంటి పర్యావరణ నిబంధనల ఉల్లంఘనలకు ప్రభుత్వం తావివ్వడం లేదన్నారు. పర్యావరణ బాధ్యతతో పనిచేసే సంస్థలకు ప్రాధాన్యం ఇస్తామని తెలిపారు
6.5 గిగావాట్ల డేటా సెంటర్ సామర్థ్యం పూర్తిస్థాయిలో అందుబాటులోకి వస్తే ప్రస్తుత సాంకేతికత ఆధారంగా ఏడాదికి సుమారు 3 టీఎంసీల నీరు అవసరమవుతుందని లోకేశ్ వివరించారు. అయితే కొత్త తరహా కూలింగ్ సాంకేతికతలు అందుబాటులోకి వస్తుండటంతో భవిష్యత్తులో నీటి వినియోగం మరింత తగ్గే అవకాశం ఉందన్నారు.
ఒక గిగావాట్ సామర్థ్యం కలిగిన థర్మల్ పవర్ ప్లాంట్తో పోలిస్తే డేటా సెంటర్ నీటి వినియోగం దాదాపు పదో వంతు మాత్రమేనని మంత్రి తెలిపారు. అందువల్ల డేటా సెంటర్ల వల్ల విశాఖ నీటి వనరులపై తీవ్ర భారం పడుతుందన్న వాదన సరికాదని పేర్కొన్నారు.
డేటా సెంటర్లకు అవసరమైన నీటిని విశాఖ నగర ప్రజల తాగునీటి అవసరాలతో కలపబోమని లోకేశ్ స్పష్టం చేశారు. పోలవరం నీటిలో పారిశ్రామిక అవసరాలకు కేటాయించిన వాటా నుంచే డేటా సెంటర్లకు నీటిని అందిస్తామని తెలిపారు. ఇందుకోసం ప్రత్యేక పైప్లైన్లు ఏర్పాటు చేస్తామని చెప్పారు.
విశాఖ నగర భవిష్యత్ నీటి అవసరాలను తీర్చేందుకు పోలవరం నీటిని గ్రావిటీ ద్వారా 18 నెలల్లో అందుబాటులోకి తీసుకురావడానికి చర్యలు చేపడుతున్నామని వెల్లడించారు. దీంతో నగర ప్రజల తాగునీటి సరఫరాపై డేటా సెంటర్ల ప్రభావం ఉండదని స్పష్టం చేశారు.
విశాఖను దేశంలోనే కీలకమైన ఏఐ హబ్గా అభివృద్ధి చేయాలన్న లక్ష్యంతో ప్రభుత్వం ముందుకు వెళ్తోందని లోకేశ్ తెలిపారు. సీఎం చంద్రబాబు నిర్దేశించిన 6.5 గిగావాట్ల డేటా సెంటర్ కేటాయింపుల లక్ష్యం ఇప్పటికే పూర్తయిందని చెప్పారు.
డేటా సెంటర్లపై అపోహలు, తప్పుడు ప్రచారాలను వ్యాప్తి చేయడం సరికాదని మంత్రి అన్నారు. ఏఐ, డిజిటల్ ఆర్థిక వ్యవస్థలో విశాఖకు ప్రత్యేక స్థానం కల్పించేందుకు ప్రభుత్వం కృషి చేస్తోందని తెలిపారు. పర్యావరణ పరిరక్షణతో పాటు నీటి వనరులపై బాధ్యతాయుతంగా వ్యవహరించే సంస్థలకే ప్రాధాన్యం ఇస్తామని స్పష్టం చేశారు.
Andhra pradesh Andhrapradesh APNews BreakingNews Breaking news BusinessNews CricketNews CrimeNews EducationNews EntertainmentNews Geopolitics Government Hyderabad India IndianCinema IndiaNews InternationalNews LatestNews MarketUpdate MovieNews News NewsToday NewsUpdate PoliticalNews shivasakthi shivasakthienterprises shivasakthimedia shivasakthi net shivasakthinet shivasakthi news shivasakthinews ShivaSakthiUpdates ShivaShaktiMedia ShivaShaktiNews SportsNews StockMarket TechNews Telangana TelanganaNews TeluguCinema TeluguNews Tollywood TrendingNews ViralNews WorldNews
