40 తర్వాత మహిళల ఆరోగ్యం.. ఆహారం, వ్యాయామంతో ఇలా జాగ్రత్త పడండి

నలభైల్లోకి అడుగుపెట్టడం అంటే శరీరం బలహీనపడిపోతుందని అర్థం కాదు. అయితే ఈ వయసులో శరీరంలో జరిగే సహజమైన మార్పులను అర్థం చేసుకుని, వాటికి అనుగుణంగా జీవనశైలిని మార్చుకోవడం చాలా అవసరం. 30 ఏళ్ల తర్వాత మొదలయ్యే హార్మోన్ల మార్పులు 40ల్లో మరింత స్పష్టంగా కనిపించవచ్చు. అలసట, నిద్రలో మార్పులు, చిరాకు, మూడ్‌ మార్పులు, బరువు పెరగడం వంటి సమస్యలు కొందరిలో కనిపించవచ్చు.

వయసు పెరిగే కొద్దీ శరీరంలో మెటబాలిజం వేగం కొంత తగ్గడం వల్ల బరువు నియంత్రణ కష్టంగా అనిపించవచ్చు. అదే సమయంలో కండరాల బలం, ఎముకల సాంద్రతను కాపాడుకోవడంపై కూడా శ్రద్ధ పెట్టాలి. కీళ్ల నొప్పులు, వెన్నునొప్పి వంటి సమస్యలు కనిపిస్తే నిర్లక్ష్యం చేయకుండా వైద్యుల సలహా తీసుకోవడం మంచిది. థైరాయిడ్‌, బీపీ, మధుమేహం వంటి ఆరోగ్య సమస్యల విషయంలోనూ క్రమం తప్పకుండా పరీక్షలు చేయించుకోవడం ఉపయోగకరం.

ఈ దశలో రోజువారీ శారీరక చురుకుదనం ఎంతో ముఖ్యం. రోజుకు కొంతసేపు వేగంగా నడవడం, యోగా చేయడం, నచ్చిన సంగీతానికి డ్యాన్స్‌ చేయడం వంటి కార్యకలాపాలు శరీరాన్ని చురుకుగా ఉంచుతాయి. కండరాల బలాన్ని కాపాడుకోవడానికి తగిన స్ట్రెంత్‌ ట్రైనింగ్‌, ఎముకల ఆరోగ్యానికి వెయిట్‌-బేరింగ్‌ వ్యాయామాలను నిపుణుల సూచనతో చేయవచ్చు.

ఆహారంలో ప్రొటీన్‌కు ప్రాధాన్యం ఇవ్వాలి. పప్పులు, గుడ్లు, పనీర్‌, పెరుగు, చేపలు, మాంసం, మొలకలు వంటి పోషకాహారాన్ని అవసరానికి అనుగుణంగా తీసుకోవచ్చు. శుద్ధి చేసిన కార్బోహైడ్రేట్లకు బదులుగా రాగులు, జొన్నలు, సజ్జలు, దంపుడు బియ్యం వంటి సంపూర్ణ ధాన్యాలను ఆహారంలో చేర్చడం మంచిది.

ఇనుము, కాల్షియం, విటమిన్‌ బి12, విటమిన్‌ డి, జింక్‌ వంటి పోషకాల అవసరాన్ని కూడా విస్మరించకూడదు. అయితే సప్లిమెంట్లను స్వయంగా తీసుకోకుండా, అవసరమైతే వైద్యుల సలహాతో పరీక్షలు చేయించుకుని తీసుకోవడం ఉత్తమం. తగినంత నీరు తాగడం, నాణ్యమైన నిద్ర, ఒత్తిడిని నియంత్రించుకోవడం కూడా 40ల్లో ఆరోగ్యానికి కీలకం.

ముఖ్యంగా ఈ వయసులో మహిళలు తమను తాము చివరి ప్రాధాన్యంగా భావించకూడదు. కుటుంబ బాధ్యతలతో పాటు తమ ఆరోగ్యం, ఆనందం, మానసిక ప్రశాంతతకు కూడా సమయం కేటాయించాలి. ప్రతి సంవత్సరం అవసరమైన ఆరోగ్య పరీక్షలు చేయించుకుంటూ, శరీరం ఇచ్చే హెచ్చరికలను నిర్లక్ష్యం చేయకుండా ఉంటే వయసు పెరిగినా ఆరోగ్యంగా, ఉత్సాహంగా జీవించవచ్చు.