ఈఏపీసెట్ 2026 షెడ్యూల్ విడుదల.. మేలో పరీక్షలు

ఈఏపీసెట్‌లో విప్లవాత్మక మార్పులు.. విద్యార్థుల కోసం సరికొత్త సదుపాయాలు

ఈ ఏడాది TS EAPCET నిర్వహణలో సాంకేతికతకు పెద్దపీట వేస్తూ పలు కీలక నిర్ణయాలు తీసుకున్నారు. ముఖ్యంగా మొబైల్ ఫోన్ ద్వారానే దరఖాస్తు చేసుకునే అవకాశాన్ని కల్పించడం విద్యార్థులకు భారీ ఊరటగా మారింది. ఇప్పటివరకు కంప్యూటర్ అవసరమయ్యే పరిస్థితి ఉండగా, ఇప్పుడు ఎక్కడైనా, ఎప్పుడైనా సులభంగా అప్లై చేసుకునే సౌలభ్యం కల్పించారు.

పూర్తి షెడ్యూల్

మే 4, 5 తేదీల్లో అగ్రికల్చర్‌, ఫార్మా ప్రవేశ పరీక్షలు
మే 9 నుంచి 11 వరకు ఇంజినీరింగ్ ప్రవేశ పరీక్షలు
ప్రతి రోజూ ఉదయం, మధ్యాహ్నం రెండు షిఫ్టుల్లో పరీక్షలు జరుగుతాయి.

పరీక్ష పూర్తయ్యగానే మార్కులు

పరీక్ష ముగిసిన వెంటనే విద్యార్థుల ప్రిలిమినరీ మార్కులు స్క్రీన్‌పై చూపించే విధానం అమలు చేస్తున్నారు. దీని ద్వారా విద్యార్థులు ఫలితాల కోసం ఎక్కువ రోజులు ఎదురు చూడాల్సిన అవసరం ఉండదు. గత ఏడాది ర్యాంకులతో పోల్చి సుమారు తమ స్థానం ఏంటి అనే అంచనాను వేసుకునే అవకాశం ఉంటుంది. ఇది విద్యార్థుల ఆందోళనను గణనీయంగా తగ్గించే చర్యగా భావిస్తున్నారు.

తప్పిదాలకు చెక్

ఆన్‌లైన్ రిజిస్ట్రేషన్ సమయంలో వివరాల్లో పొరపాట్లు జరిగితే ఎడిట్ ఆప్షన్ అందుబాటులో ఉంటుంది. అలాగే ఇంటర్ బోర్డు నుంచి డేటా తీసుకోవడం ద్వారా సమాచారం ధృవీకరణకు ప్రత్యేక చర్యలు తీసుకుంటున్నారు. స్ట్రీమ్ ఎంపికలో పొరపాట్లు ఉంటే హెల్ప్‌డెస్క్ ద్వారా వెంటనే సమాచారం అందిస్తారు.

విద్యార్థుల ఆరోగ్యానికి ప్రాధాన్యం

పరీక్షా కేంద్రాలను స్టూడెంట్ ఫ్రెండ్లీగా తీర్చిదిద్దుతున్నారు. డయాబెటిస్, జ్వరం వంటి ఆరోగ్య సమస్యలున్న విద్యార్థులకు అవసరమైన వైద్య సాయం అందించే ఏర్పాట్లు చేస్తున్నారు.

పారదర్శకత – సాంకేతికత కలయిక

పరీక్షల నిర్వహణలో ఎలాంటి లోపాలు దొర్లకుండా పర్యవేక్షణ పెంచుతున్నారు. సాంకేతికత ఆధారంగా పారదర్శకతను మెరుగుపరుస్తూ, విద్యార్థులకు నమ్మకాన్ని కలిగించేలా చర్యలు తీసుకుంటున్నారు.