చిప్స్, బిస్కిట్లు, చాక్లెట్లు అధికంగా తీసుకోవడం ఆరోగ్యానికి హానికరం

చిప్స్, బిస్కిట్లు, చాక్లెట్లు, కేక్స్ వంటి రుచి పెంచే పదార్థాలు మరియు నిల్వ పదార్థాలు కలిపి తయారయ్యే అల్ట్రా ప్రాసెస్డ్ ఫుడ్స్ (UPFs) చిన్న పిల్లలకు ఎక్కువగా ఇస్తున్నారా? అయితే మరోసారి ఆలోచించాల్సిన సమయం వచ్చింది. తాజా పరిశోధనలో ఇలాంటి ఆహారాలు ఎక్కువగా తీసుకునే పిల్లల్లో ఆస్థమా ముప్పు గణనీయంగా పెరుగుతోందని తేలింది.

స్పెయిన్‌లో 4 నుంచి 5 ఏళ్ల వయసు గల పిల్లలపై నిర్వహించిన ఈ అధ్యయనంలో, ఇప్పటికే ఆస్థమా లేదా అలర్జీ ఉన్న పిల్లలను పరిగణనలోకి తీసుకోలేదు. అన్ని ఇతర కారణాలను సర్దుబాటు చేసిన తర్వాత విశ్లేషించగా, తక్కువగా UPFs తీసుకున్న పిల్లలతో పోలిస్తే ఎక్కువగా తీసుకున్న పిల్లల్లో ఆస్థమా వచ్చే అవకాశం సుమారు నాలుగు రెట్లు అధికంగా ఉన్నట్టు గుర్తించారు.

అయితే ఆస్థమాకు ప్రధాన కారణం జన్యు స్వభావమే అయినప్పటికీ, ఆహారం, జీవనశైలి, పర్యావరణ పరిస్థితులు కూడా కీలక పాత్ర పోషిస్తున్నాయని పరిశోధకులు చెబుతున్నారు. UPFs నేరుగా ఆస్థమాకు కారణమని ఇంకా రుజువు కాలేదు కానీ, ఇవి రోగనిరోధక వ్యవస్థ మరియు శ్వాసకోశ ఆరోగ్యంపై ప్రతికూల ప్రభావం చూపే అవకాశం ఉందని ఆందోళన వ్యక్తం చేస్తున్నారు.

ముఖ్యంగా చిన్న వయసులోనే జంక్ ఫుడ్ అలవాట్లు పెరగడం భవిష్యత్తులో ఆరోగ్య సమస్యలకు దారి తీసే అవకాశం ఉంది. మన దేశంలోనూ పిల్లల్లో బిస్కిట్లు, కేక్స్, చాక్లెట్లు, కూల్‌డ్రింకుల వినియోగం పెరుగుతున్న నేపథ్యంలో తల్లిదండ్రులు మరింత జాగ్రత్తగా ఉండాలని నిపుణులు సూచిస్తున్నారు. ఆరోగ్యకరమైన ఆహారపు అలవాట్లు చిన్నప్పటి నుంచే పెంపొందించడం అత్యంత అవసరమని ఈ అధ్యయనం స్పష్టం చేస్తోంది.