తిరుమలలో భారీగా తగ్గిన భక్తుల రద్దీ

తిరుమలలో భక్తుల రద్దీ అనూహ్యంగా తగ్గడం, సాధారణ భక్తులకు సులభ దర్శనం లభించడం వల్ల ఊరట లభిస్తోంది

తిరుమలలో అనూహ్యంగా భక్తుల రద్దీ భారీగా తగ్గింది. వారాంతాల్లో తప్ప మిగిలిన రోజుల్లో సాధారణ రద్దీ కంటే చాలా తక్కువగా భక్తులు కనిపిస్తున్నారు. వేసవి సెలవుల్లో భారీ రద్దీ ఉంటుందని అంచనా వేసిన తిరుమల తిరుపతి దేవస్థానం (టీటీడీ) ప్రత్యేక ఏర్పాట్లు కూడా చేసింది. ఇందులో భాగంగా వీఐపీ బ్రేక్ దర్శనాలను రద్దు చేయడం, రింగురోడ్డులో అదనపు క్యూలైన్లు ఏర్పాటు చేయడం వంటి చర్యలు తీసుకుంది.

అయితే ప్రస్తుతం పరిస్థితి భిన్నంగా కనిపిస్తోంది. సోమవారం వంటి సాధారణ రోజుల్లో కూడా క్యూలైన్లు ఖాళీగా ఉండటంతో సర్వదర్శనానికి వచ్చిన భక్తులు ఎటువంటి ఎక్కువ నిరీక్షణ లేకుండానే స్వామివారిని దర్శించుకుంటున్నారు. ఇది సామాన్య భక్తులకు పెద్ద ఊరటగా మారింది.

రద్దీ తగ్గడంతో వసతి సౌకర్యాలపై కూడా ప్రభావం కనిపిస్తోంది. సాధారణంగా వీఐపీ సిఫారసు లేఖలతో రద్దీగా ఉండే శ్రీపద్మావతి విచారణ కేంద్రం, ఎంబీసీ ప్రాంతాల్లో గదుల డిమాండ్ గణనీయంగా తగ్గింది. సిఫారసు దర్శనాలను తాత్కాలికంగా నిలిపివేయడంతో అనేక గదులు ఖాళీగా ఉంటున్నాయి. ఈ పరిస్థితిని దృష్టిలో ఉంచుకుని టీటీడీ అధికారులు మిగిలిన గదులను దర్శన టికెట్లు కలిగిన సాధారణ భక్తులకు కేటాయించే అవకాశం కల్పించారు.

దీంతో వేసవి ఎండల్లో వసతి కోసం ఇబ్బందులు పడకుండా భక్తులు సులభంగా గదులు పొందే పరిస్థితి ఏర్పడింది. ప్రస్తుతం సాయంత్రం వేళల్లో కొంత రద్దీ కనిపిస్తున్నప్పటికీ, గతంతో పోలిస్తే దర్శన సమయం గణనీయంగా తగ్గినట్లు తెలుస్తోంది.