ఏపీలో పెట్టుబడులకు ఇదే సరైన సమయం.. ప్రవాసాంధ్రులే బ్రాండ్ అంబాసిడర్లు: లోకేశ్

ఆంధ్రప్రదేశ్‌ అభివృద్ధిలో ప్రవాసాంధ్రులు కీలక భాగస్వాములు కావాలని తెదేపా వర్కింగ్‌ ప్రెసిడెంట్‌, మంత్రి నారా లోకేశ్‌ పిలుపునిచ్చారు. రాష్ట్రంలో పెట్టుబడులకు అపార అవకాశాలు ఉన్నాయని, ప్రపంచవ్యాప్తంగా వివిధ రంగాల్లో పనిచేస్తున్న ప్రవాసాంధ్రులు తమ పరిచయాలు, అనుభవం, పెట్టుబడులతో ఏపీ అభివృద్ధికి తోడ్పడాలని కోరారు. దేశానికి వచ్చే ప్రతి రూ.100 పెట్టుబడిలో సుమారు రూ.25 ఆంధ్రప్రదేశ్‌కు వస్తున్నాయని పేర్కొన్నారు. గూగుల్‌, ఆర్సెలార్‌ మిత్తల్‌ వంటి సంస్థలతో పాటు విమాన, రక్షణ రంగాలకు సంబంధించిన పరిశ్రమలు కూడా రాష్ట్రంలో పెట్టుబడులు పెట్టేందుకు ముందుకొస్తున్నాయని తెలిపారు.

మంగళగిరిలోని తెదేపా కేంద్ర కార్యాలయంలో గ్లోబల్‌ ఎన్నారై టీడీపీ కేంద్ర కమిటీ నూతన కార్యవర్గ ప్రమాణస్వీకార కార్యక్రమం జరిగింది. కమిటీ అధ్యక్షుడు డా. గురురాజాతో పాటు 45 మంది కార్యవర్గ సభ్యులతో మంత్రి కొండపల్లి శ్రీనివాస్‌ ప్రమాణస్వీకారం చేయించారు. పలువురు సభ్యులు వారు నివసిస్తున్న దేశాల నుంచి జూమ్‌ ద్వారా కార్యక్రమంలో పాల్గొన్నారు. ఈ సందర్భంగా ముఖ్యఅతిథిగా హాజరైన లోకేశ్‌ ప్రవాసాంధ్రుల పాత్రను ప్రశంసించారు.

ప్రస్తుతం ఏపీ సుమారు 200 బిలియన్‌ డాలర్ల ఆర్థిక వ్యవస్థగా ఉందని, భవిష్యత్తులో దాన్ని 2.4 ట్రిలియన్‌ డాలర్ల స్థాయికి తీసుకెళ్లాలన్న లక్ష్యంతో ప్రభుత్వం పనిచేస్తోందని లోకేశ్‌ తెలిపారు. ఈ మహత్తర లక్ష్యాన్ని సాధించడంలో ప్రవాసాంధ్రుల భాగస్వామ్యం ఎంతో అవసరమన్నారు. తాము నివసిస్తున్న దేశాల్లో, పనిచేస్తున్న సంస్థల్లో ఏపీకి బ్రాండ్‌ అంబాసిడర్లుగా వ్యవహరించాలని కోరారు.

గతంలో అమరావతి ఉద్యమానికి, రైతులు, మహిళలకు ప్రవాసాంధ్రులు అందించిన మద్దతును లోకేశ్‌ గుర్తుచేశారు. న్యాయపోరాటానికి విరాళాలు అందించడంతో పాటు, రాజకీయ పరిణామాల సమయంలో స్వదేశానికి వచ్చి తెదేపాకు మద్దతుగా ఎన్నికల ప్రచారంలో పాల్గొన్నారని చెప్పారు. సొంత గ్రామాల్లో అభివృద్ధి కార్యక్రమాలకు కోట్లాది రూపాయలు వెచ్చిస్తున్న ప్రవాసాంధ్రులను అభినందించారు.

చంద్రబాబు అరెస్టు సమయంలో ప్రపంచవ్యాప్తంగా ప్రవాసాంధ్రులు నిర్వహించిన నిరసన కార్యక్రమాలు తమ కుటుంబానికి ఎంతో ధైర్యాన్ని ఇచ్చాయని లోకేశ్‌ పేర్కొన్నారు. 50 దేశాల్లోని 200కుపైగా నగరాల్లో ‘ఐయామ్‌ విత్‌ సీబీఎన్‌’ కార్యక్రమాలు నిర్వహించి తమ సంఘీభావాన్ని చాటారని తెలిపారు.

ప్రపంచంలోని ప్రతి దేశంలో తెలుగువారిని టీడీపీతో అనుసంధానం చేయాలని లోకేశ్‌ సూచించారు. కనీసం పది మంది తెలుగువారు ఉన్న ప్రతి దేశంలో ఎన్నారై టీడీపీ కమిటీ ఏర్పాటు చేయాలని, వాటిని ‘మై టీడీపీ’ యాప్‌తో అనుసంధానం చేయాలని అన్నారు. రాబోయే 30 రోజుల్లో కమిటీల ఏర్పాటు ప్రక్రియను పూర్తి చేయాలని సూచించారు. గ్రూపు రాజకీయాలకు దూరంగా ఉండి అందరూ టీడీపీ వర్గంగానే పనిచేయాలని పిలుపునిచ్చారు.

కేంద్రమంత్రి పెమ్మసాని చంద్రశేఖర్‌ మాట్లాడుతూ.. విదేశాల్లో ప్రవాసాంధ్రులు సంపాదించిన విజ్ఞానం, ఆదాయాన్ని మాతృభూమి అభివృద్ధికి వినియోగించాలని కోరారు. రాష్ట్రంలో వ్యాపారాలు, పరిశ్రమలు ఏర్పాటు చేసి ఉపాధి అవకాశాల కల్పనకు సహకరించాలని అన్నారు. ప్రవాసాంధ్రులకు పార్టీ వివిధ స్థాయిల్లో బాధ్యతలు అప్పగిస్తూ గౌరవిస్తోందని చెప్పారు.

మంత్రి కొండపల్లి శ్రీనివాస్‌ మాట్లాడుతూ.. తెలుగువారికి ప్రత్యేక గుర్తింపు, ఆత్మగౌరవాన్ని కల్పించాలనే లక్ష్యంతో ఎన్టీఆర్‌ టీడీపీని స్థాపించారని పేర్కొన్నారు. చంద్రబాబు చేపట్టిన ఐటీ సంస్కరణలు ప్రపంచవ్యాప్తంగా ఎంతోమంది తెలుగువారికి అవకాశాలు కల్పించాయని తెలిపారు. విదేశాల్లో స్థిరపడిన తెలుగువారు తమ భాష, సంస్కృతిని పరిరక్షించడంలో కీలక పాత్ర పోషిస్తున్నారని అన్నారు.

గ్లోబల్‌ ఎన్నారై టీడీపీ కేంద్ర కమిటీ అధ్యక్షుడు డా. గురురాజా మాట్లాడుతూ.. టీడీపీ ఎన్నారై విభాగంలో ఇప్పటికే 50 వేల మంది సభ్యులు ఉన్నారని తెలిపారు. ప్రతి ప్రవాసాంధ్రుడు తన స్వగ్రామంలో కనీసం 15 మందిని ప్రభావితం చేసే స్థాయికి ఎదగాలని ఆకాంక్షించారు. రాబోయే ఎన్నికల్లో 50 లక్షల మందిని ప్రభావితం చేసే స్థాయిలో ఎన్నారై విభాగం పనిచేయాలని లక్ష్యంగా పెట్టుకున్నట్లు తెలిపారు. సామాజిక మాధ్యమాల ద్వారా వాస్తవాలను ప్రజలకు చేరవేయడంతో పాటు స్థానిక పార్టీ నేతలకు అండగా నిలవాలని పిలుపునిచ్చారు.