పులుపు పండ్లు జలుబు పెంచుతాయా?.. అసలు నిజం ఇదే

జలుబు చేసినప్పుడు నిమ్మ, నారింజ వంటి పులుపు పండ్లు తింటే జలుబు మరింత పెరుగుతుందని చాలా మంది భావిస్తుంటారు. అందుకే చాలామంది ఆ పండ్లను పూర్తిగా మానేస్తారు. అయితే ఇది పూర్తిగా అపోహ మాత్రమేనని వైద్యులు చెబుతున్నారు. నిమ్మ, నారింజ వంటి పండ్లలో విటమిన్‌–సి సమృద్ధిగా ఉండడం వల్ల శరీరంలోని రోగనిరోధక శక్తి పెరుగుతుంది. దీంతో శరీరం వైరస్‌లతో పోరాడే సామర్థ్యం పెరుగుతుంది.

వైద్యుల ప్రకారం జలుబు సాధారణంగా వైరస్‌ వల్ల వస్తుంది. ఈ సమయంలో శరీరానికి సరైన పోషకాలు అందితే త్వరగా కోలుకునే అవకాశం ఉంటుంది. విటమిన్‌–సి ఉన్న పండ్లు, కూరగాయలు తీసుకోవడం వల్ల శరీరం ఇన్‌ఫెక్షన్లను ఎదుర్కోవడంలో బలంగా ఉంటుంది.జలుబు ఉన్నప్పుడు వేడి ఆహారాలు తీసుకోవడం చాలా ఉపయోగకరమని నిపుణులు చెబుతున్నారు. వేడి సూప్‌లు, అల్లం టీ, కషాయాలు గొంతు నొప్పి, ముక్కు దిబ్బడను తగ్గించడంలో సహాయపడతాయి. ముఖ్యంగా అల్లం, తేనె, మిరియాలు కలిపిన పానీయాలు గొంతుకు ఉపశమనం కలిగిస్తాయి.

అదేవిధంగా ఈ సమయంలో శరీరాన్ని హైడ్రేట్‌గా ఉంచడం చాలా ముఖ్యం. తగినంత నీరు తాగడం, వేడి ద్రవాలు తీసుకోవడం వల్ల శరీరంలోని టాక్సిన్లు బయటకు వెళ్లి కోలుకునే ప్రక్రియ వేగవంతమవుతుంది. అలాగే పండ్లు, కూరగాయలు, తేలికపాటి ఆహారం తీసుకోవడం మంచిది.అయితే చాలా చల్లని పదార్థాలు, ఫ్రిజ్‌లో ఉంచిన పానీయాలు ఎక్కువగా తీసుకోవడం మంచిది కాదని వైద్యులు సూచిస్తున్నారు. అలాగే తగినంత విశ్రాంతి తీసుకోవడం, శరీరానికి అవసరమైన పోషకాహారం తీసుకోవడం ద్వారా జలుబు త్వరగా తగ్గే అవకాశం ఉంటుందని చెబుతున్నారు.

మొత్తానికి జలుబు వచ్చినప్పుడు నిమ్మ, నారింజ వంటి పండ్లు తినకూడదనే భావన తప్పు. సరైన ఆహారం, ద్రవాలు, విశ్రాంతి ఉంటే శరీరం త్వరగా కోలుకుంటుందని శరీరాన్ని హైడ్రేట్‌గా ఉంచేందుకు ఎక్కువగా నీరు, వేడి పానీయాలు తీసుకోవడం మంచిదని వైద్యులు చెబుతున్నారు. సరైన విశ్రాంతి, పోషకాహారం తీసుకుంటే జలుబు త్వరగా తగ్గే అవకాశముంటుంది.